切勿輕信「防敏」、「低敏」、「抗敏」字眼

😡 寫這一篇文章的時候，塊面都仲痕緊，一撻撻，化妝都無用，只能夠減淡紅印。
我知我知，敏感中係唔可以化妝，但係我仲要返工，唔化妝又點見人呢？！怪就怪自己又誤信「防敏」、「低敏」、「抗敏」字眼。

近排見皮膚好返D，但有好多暗瘡印同暗瘡疤痕，女仔梗係想盡快搞返好D皮膚，人之常情。我是敏感底 (點解會變成敏感皮膚，下次再同大家講。)，我買skincare前一定做好多research，亦都睇好多forum/blog/官方資料等等。我今次信左呢隻 "juice beauty 有機青蘋果低敏煥膚面膜"🙅🙅🙅🙅。有機天然brand 無死喇掛？！

From官方facebook fans page share post:

"產品的功效：
有效去角質、去粉刺、黑頭，淡化色斑、改善粗糙及暗啞肌膚、治療暗瘡、修復暗瘡疤痕 、淡化色斑 、減少幼紋皺紋

開始使用時會有一點點吉吉地和輕微紅的現象出現，當然都有點怕怕自己會敏感，但由於我是底層較乾的肌膚，所以是正常的現象，每一次我做完煥膚後，我也必定會敷保濕面膜，這樣可讓肌膚更吸收，而且肌膚做完煥膚後，不單能提亮膚色，就連毛孔也收細了很多"😍"

💢今次一如以往，先試局部，無事先試全面，但注意試左都未必100%無事。💢

我先試有暗瘡的位置，同埋黑頭位置，左邊面靚靚部分，大約1/6，有跟足程序，再敷保濕mask。除左有D乾，有D紅，根據官方同blogger講: 這係正常反應，心諗即係無事啦，信你架喇 👉👉👉「低敏」，以為終於可以變返靚靚！💁

過左一個星期，我試全面用喇，都係好紅，依然以為係正常反應。第二日，好痕，好紅，甩皮，全面摸落去係"鞋" ，眼都腫埋（我係有避開眼周），OK！我承認喇，我又敏感喇。即刻fu左保濕mask， 鎮靜一下。連續敷左三日仲係一撻撻，好唔開心，好驚。😭😭😭😭

第四日，好左dd,但都仲係一撻撻同紅，摸落去係"鞋"， 又甩皮，仲起曬細細粒有膿瘡＋無膿瘡，心諗: 頂！！！唔係又要睇醫生呀😓？！

＊問左官方，未有回覆。